Abone arşivleri - Servet-i Fünun Dergisi

İfade-i Mahsusa

Ahmed İhsan — Sat, 06 Aug 2016 16:40:14 +0000

Servet-i Fünûn bu nüshasıyla beşinci sene-i neşriyatını ikmal eyleyerek bi-mennihi teala altıncı senesine mübaşeret eyliyor. Beş sene müddet-i kemal intizam ve sebat ile ifa-yı vazife-i neşriyeye muvaffakiyet ne kadar mucib-i iftihar ve sürurumuz ise mütalaayin-i kiram tarafından mütezayiden müşahede eylediğimiz rağbet ve hüsn kabul dahi o derece badi-i şükran ve mübahatımızdır. Nasıl iftihar etmeyelim ki Osmanlı âlem-i matbuatında haftalık olmak şartıyla zuhur etmiş – musavver, gayr-i musavver – ne kadar gazete ve risale varsa hiçbirisi şimdiye kadar beş senelik mevcudiyet-i muntazama ve daimeyi iraeye muvaffak olamamıştır. Nasıl müteşekkir ve mübahi olmayalım ki hiçbir ceride-i üsbuiye Servet-i Fünûn raddesinde erbab-ı mütalaamızın mazhar-ı rağbet ve takdiri bulunamamıştır.

Geçen sene böyle yeni sâl-i neşriyata mübaşeret vesilesiyle yazdığımız ifadede gazetemizin derece-i intişar, aded-i tabı hakkında bir ufak istatistik derç etmiştik, o istatistikte her türlü mübalağa ve riyadan ari olarak bidayet-i tesisimizde altı yüz adediyle başlayan aded-i tabımızın tedricen 1700 miktarına vasıl olduğunu haber vermiştik, işte o zamandan beri güzeran eden bir sene zarfında şu miktara iki yüz daha zam eyleyerek bugün altıncı sâl-i hayatımıza 1900 adet tab ile bed ediyoruz, bir sene zarfında bulduğumuz iki yüz fazla müşteri bizim en büyük istinatgâh-ı muvaffakiyetimizdir, zira devam ve ehemmiyetin yalnız tedricen olan terakkilerde bulunduğuna şüphe yoktur.

İstatistiğimiz hakkında malumat-ı mütemmimeden olmak üzere beyan edelim ki her hafta meydan-ı intişara vaz eylediğimiz 1900 nüsha Servet-i Fünûn’un yedi yüz küsuru İstanbul’da sarf olunuyor, mütebakisi kâmilen vilayat-ı şahaneye ve memalik-i İslamiyeye sevk ediliyor; bu dahi memalik-i Osmaniye ve İslamiyede maarifin derece-i tamına güzel bir mikyas addolunabilir. İstanbul’da sarf olunan nüshaların kıraathaneler vasıtasıyla on beş misli kari bulduğu dahi nazar-ı dikkate alınırsa şehrimizde dahi intişar-ı maarif nokta-i nazarından müşterinin ekalliyetinden şikâyet caiz görülemez.

İşte hayat-ı maddiyemizi irae eyledik. Hayat-ı maneviyemiz yani mesleğimiz ise bidayet-i teessüsümüzden beri olduğu gibi sadakatten, tarikimiz dahi istikametten ibarettir, hemen Cenab-ı Rab-ı Mennan muvaffakun bil-hayr eyleye.

İfade-i Mahsusa yazısı ilk önce Servet-i Fünun Dergisi üzerinde ortaya çıktı.

İhtar-ı Mahsus

Ahmed İhsan — Tue, 07 Mar 2017 20:08:21 +0000

Gelecek perşembeye mahsus olan 286 numaralı nüshamız cülus-ı meyamin-i menus-ı cenab-ı padişahiye mütesadif Pazartesi günü yani yevm-i mutadından üç gün evvel neşrolunacaktır.

(…)

İhtar-ı Mahsus yazısı ilk önce Servet-i Fünun Dergisi üzerinde ortaya çıktı.

İhtar

Servet-i Fünûn — Fri, 14 Sep 2018 22:56:05 +0000

Akdemce abone kayıt olunup da vakit ve zamanıyla taahüdatını ifa etmeyerek tekasit-i muayyeneleri hulul ve mürur etmiş ve bu cihetle matbaaya borçlu kalmış olanların, çıkan kitap ve formaları talep etmeğe hakları olamayacağı gibi evvelce vermiş oldukları mebaliğ dahi kendilerine ret ve iade edilmeyeceğinden bu misillülerin şerait-i muharrere ve mevzuası veçhile bir hafta zarfında Servet-i Fünûn matbaasına müracaatla tediye-i deyn ederek mevcut kitapları almaları lazımdır.

İhtar yazısı ilk önce Servet-i Fünun Dergisi üzerinde ortaya çıktı.

İhtar

Servet-i Fünûn — Tue, 18 Sep 2018 23:13:26 +0000

Abonelerimizin gazeteleri muntazaman gönderilmekte ise de bazen postalarda zayi olduğu görülüyor. Kariin-i kiramın memnuniyetini temin etmek üzere zayi olan nüshaların numaraları idarehanemize bildirilince- tekrar gönderilmektedir.

İhtar yazısı ilk önce Servet-i Fünun Dergisi üzerinde ortaya çıktı.

Vilayat Abonelerimize İhtar-ı Mahsus

Servet-i Fünûn — Sat, 01 Dec 2018 22:56:02 +0000

Gazetemizin yevm-i intişarı olan Perşembe günleri Dersaadet’ten vilayat-ı şahaneye hareket eden postalar bir hafta muvafık düştüğü halde –ekser vapurların on beş günde bir olmasından dolayı- ertesi haftaya gayr-ı muvafık geliyor. Binaenaleyh Suriye ve mülhakatı ile sair bazı mahallere nüshalarımızı iki haftada bir defa irsale mecburiyet hâsıl oluyordu. Şu hal karilerimizin nahoşnudîsini mucip olup birçok muhik şikâyetler alınmış ve Suriye abonelerimizin miktarı idaremizi hakikaten minnettar eyleyecek kadar kesretli bulunmuş olduğundan naşi, gelecek numaradan itibaren vilayat-ı şahane nüshalarını çarşamba gününden postaneye tevdie karar verdik. Vakıa çarşamba günleri hemen her cihet postaları muntazaman hareket eylemektedir. Hele Suriye ve mülhakatı için o gün hareket eden Hidiviye vapuruyla ve kemal-i intizam ile gazete irsali kabil olacaktır. Yalnız, nüshaların çarşambadan postaya tevdii kısm-ı siyasimize o günkü tevcihatın naklini ihtimal haricine çıkarıyor. Bundan dolayı badema kısm-ı siyasiye ancak beher haftanın salı gününden itibaren ertesi salıya kadar olan tevcihat ve tebligat-ı resmiyesi derç kılınacaktır. Tabiidir ki şu hal İstanbul tevziatımız için hiçbir güne tebdili mucip olmayacaktır.

Vilayat Abonelerimize İhtar-ı Mahsus yazısı ilk önce Servet-i Fünun Dergisi üzerinde ortaya çıktı.

İhtar-ı Mahsus

Servet-i Fünûn — Wed, 23 Jan 2019 13:39:39 +0000

Abonelerimize nüshalar her hafta muntazaman ve mutarriden posta ile irsal kılınmakta ise de bazı haftalar gazetesini alamamış bulunan abonelerimiz idarehanemize eşar-ı keyfiyet ettikleri takdirde o nüsha tekrar irsal olunur.

İhtar-ı Mahsus yazısı ilk önce Servet-i Fünun Dergisi üzerinde ortaya çıktı.