Kudüs-i Şerif’te aza-i kiramdan Şeyh Muhammed El-Buhari Kaddese sırrahulali hazretlerine ve Buhara ile cihat-ı saire-i müslimeden gelenlerin ikametine mahsus bulunan ve ekser yerleri mürur-ı zaman ile münhedim ve müşerref-i harap olan zaviyenin tamiri hususuna işbu mayısta irade-i diyanet-ade-i cenab-ı padişahi şeref-müteallik buyurulduğu cihetle kemal-i süratle tamirat ve termimatı ifa edilerek bu defa teyemmünen resm-i küşadı icra kılınmıştır ki resm-i behin-i mezkuru irae eden resim tezyin-i sahife-i mübahat olunmuştur. (…)

Resimlerimiz yazısı ilk önce Servet-i Fünun Dergisi üzerinde ortaya çıktı.

Boğaziçi manzaraları sırasında Baltalimanı mevkinin letafeti ile hakikaten şayan-ı temaşadır. Bu mevkide bir de köprü vardı ki geçenlerde münhedim olmuş ve yerine demirden bir diğeri yapılmıştır. Eski köprü ile limanın manzarasını irae eder bir resm-i fotoğraf heveskârlarından bir zat tarafından idaremize irsal kılınmıştı. Mevkinin bir hatırası olmak üzere hakkettirip derc-i sahife eyledik.

“Makale: İtalya ve Habeş Vakayi”

İtalya ve Habeş muharebesinde nazar-ı dikkati celbeden müşahirin tesavirini 252 numaralı nüshamıza derç eylediğimiz gibi bugün dahi işbu meselede en mühim nokta-i mücadele bulunan Makale kalesi ile “ednajezüv” kalesini pişegâha vaz eyliyoruz.

“Nablus Vadisi”

Kudüs-i Şerif’e mülhak olan Nablus kasabası bir mutasarrıflık merkezi olup hakikaten şayan-ı dikkat bir vadide kaindir. Manzarası gayet latif ve pek ziyade münbittir. Fakat kasaba esasen vasi değildir. Kudüs-i Şerif’e mesafesi iki gün olup güzel bir şose ile merbuttur. Seyyar muhbirimizden varit olan bir fotoğraftan hakk olunmuştur.

“Hanri de Battenberg [Battenberg Prensi Henry]”

İngiltere kraliçesinin damadı Prens Hanri de Battenberg bir hayli zamandır namizaç bulunduğu cihetle bu defa bahren tebdil-i havaya azimet etmişken vapurda vefat etmiştir.

“Devrilmez Sandal”

Berlin’de merakib-i sagire-i bahriye meraklılarından Mösyö Bin isminde bir zat şu yakında sandallara asla su içinde devrilmemek üzere bir tertip yapmış ve Berlin şehri civarında ve Danze nam gölde tecrübesini icra edip hüsn-i muvaffakiyet görmüştür. Bu zat sandalının altına su içinde bulunmak üzere bir cism-i sakil asarak bu cisme sandalın iki tarafa eğildiği zaman muvazenesini husule getirmek ve devrilmek tehlikesini ortadan kaldırmak üzere yeni bir tertip yapmıştır. Mütenevvi tecrübesini icra ettiği zaman sandalın kenarına rapt edip bir metreden ziyade uzattığı tahtanın üstüne çıkmıştır.

Sandalın kenarında dahi biri durduğu halde sandal yine devrilmemiştir. Halbuki sair merakib-i bahriyede ve ezan cümle kayık ve sandal gibi merakib-i hafifede muvazenet meselesini daima gözetmek lazım gelip hatta bizim kayıkçılar müşterileri denk gelmek şartıyla oturtmadıkça kürek çekmezler. Dalgaların yandan muhacematına bu gibi merakibin tahammülü de azdır. İşte Mösyö Bin bu noktaları nazar-ı itibara alarak deniz içine ve sandalın altından bir cism-i sakil sarkıtmıştır. Bazı büyük vapurlarda ve mesela idare-i mahsusanın adalar seferini icra eden Kadriye ve Aydın vapurlarında arzani demir yolu üzerine mevzu bir cism-i sakil bulunur ki vapur bir tarafa yattıkça diğer tarafa alınıp onunla muvazene husule getiriyor. Mösyö Bin’in tertibi buna benziyor. Cism-i sakil sandalın yattığı cihetten aksi tarafa sandal içindeki bir manivela vasıtasıyla sevk olunup sandal ne kadar bir cihete meyletse gark olmak tehlikesinden masun kalıyor. Bu icadın fırtınalı zamanlarda ve tahlisiye sandallarında külli faide ve hizmeti olacağı tahmin olunmaktadır.

“Gazla Muharrik Tramvaylar”

Dersaadet tramvay şirketi bu aralık hayvanların  yerine başka bir kuvve-i ceriye-i mihanikiye ikamesini arzu edip hatta bu bapta Nafia Nezaret-i Celilesine bir de layiha taktim ettiği ve bu layiha fen kalemince derdest-i tetkik bulunduğu evrak-ı yevmiyede okunmuş ve hayvanatın tramvaylarda pek ziyade zahmeti ve telefi de ayrıca erbab-ı insaniyetin nazar-ı dikkatini calip bulunmuştur.

Resimlerimiz yazısı ilk önce Servet-i Fünun Dergisi üzerinde ortaya çıktı.

Fransa meşahir-i şuarasından olduğu halde birkaç hafta akdem vefat eden Pol Verlen’in resmi bu nüshamızda münderiçtir. Bu zat letafet-i beyanı ve efkar-ı şairanesiyle umumun muhabbet ve riayetini kazanmış hoş bir meşrebe lakaydane bir mesleğe malikmiş. Eşarı pek rengîn görülüyor. Her ne kadar Fransa’da bu son senelerde eşar-ı asar-ı saire-i edebiye kadar haiz-i itibar görülmemekte ise de Pol Verlen’in asarı temayül-i umumiye mazhariyette bir istisna teşkil etmiştir. Tercüme-i hali ile asarından birkaç parça numune gelecek nüshamıza bırakıldı.

Resimlerimiz yazısı ilk önce Servet-i Fünun Dergisi üzerinde ortaya çıktı.