Nur-i İslam tenvir-ı uyun-ı enam ederek beşeriyetin ikbal-i istikbalini temin eylemiş ve bu hakikat asrın en büyük erbab-ı maarif ve kemalatınca da musaddık olduğu cihetle bizim için bu hakikat-ı müsellemeyi ispata ihtiyaç kalmamıştır. Şarkın envar-ı kemalatı garbın badi-yi feyz-i istidadı olduğuna delil aramak lazımsa medeniyet-i hazıranın asar-ı ilm ve irfanı olan binlerce müdevvenat zemin-i müddeada arz ve işhat olunur.

Asar-ı medeniyet-i İslamiye hakkında tetkikat mûşikâfanesiyle meşhur Doktor Gustav lö Bon’un [Gustave Le Bon] Medeniyet-i Arabiye unvanı altında birkaç ciltten mürekkeb neşrettiği asar-ı güzini ki matbuat-ı Garbiyede – bu babda yazılan asar meyanında sıhhat ve mükemmeliyetle bir mevki-i mümtaz ihraz etmiştir – Arap’ın müessir irfan ve kemalatı ulema-yı hazıra-yı Garp’ın dahi müsellim ve muterifi bulunduğu delil-i alenidir. (…)

Resimlerimiz yazısı ilk önce Servet-i Fünun Dergisi üzerinde ortaya çıktı.

Prens Ferdinand’ın mahdumu Prens Boris’in Ortodoks mezhebine resm-i kabulünde bulunmak üzere taraf-ı Saltanat-ı Seniyyeden buyrulan memurin-i Osmaniye’nin azimet ve avdetlerini evvelki nüshalarımızın kısm-ı siyasiyesinde  yazmış olduğumuz gibi henüz iki yaşında bulunan Prens Boris’in resmini dahi bugünkü nüshamıza derç eyliyoruz.

Prens Boris 1894 senesi Kânunusani-yi Rumi’sinin 18’inde Sofya’da tevellüt etmiştir. Validesi Borbon [Bourbon] hanedanından Prenses de Parma’nın veladeti dahi 1870 senesi Kânunusani’nin 17’nci gününe müsadiftir.

“Yafa Liman Dairesi”

12’nci sayfamızda gördüğünüz resim Yafa’da ilaveten inşa olunan liman dairesini irae eyliyor. Yafa’nın emvac-ı bahre ne derecelerde matuf olduğu ve mevkinin nezaketi nazar-ı dikkate alınınca liman idaresinin ehemmiyet-i hizmeti tayin eyler.

Yeni dairenin heyeti hizmetin ehemmiyetiyle mütenasip bir hâlde olmakla fotoğrafisi muhabirimiz tarafından matbuatımıza gönderilmiş ve hak ettirilerek idhâl-i sütun kılınmıştır.

Resimlerimiz yazısı ilk önce Servet-i Fünun Dergisi üzerinde ortaya çıktı.