Birinci sayfamızdaki resmin manzarasını beğendiniz değil mi? İşte biz de fevkalade beğendiğimiz için hak ettirerek pişgâh-ı temaşanıza vaz eyledik. Bu Adapazarı’nda bir mevki-i ferah-fezadır ki kasabanın birinci mesiresi hükmünde sayılıyor. Adapazarı’nın nerede olduğunu tarife gerek yoktur zannederim. Her sabah Haydarpaşa’dan Ankara’ya Konya’ya doğru hareket edip giden katar, İzmit’ten sonra latif vadiyi, zarif gölü arkada bırakınca bir istasyonda tevkif eder ki üzerinde “Ada Pazarı” ismi okunur.  Hâlbuki asıl kasaba bir saat kadar içeridedir ve arabalarla giderler. Kariben bu yolda demir çubukların tefrişi mütesavver bulunduğu cihetle resmini temaşa eylediğiniz subaşına, çağlayan kenarına kadar da şimendiferle gidilecek demektir.

“Bingazi Kışlası “

Resmi gazetemize derç olunan işbu kışla hakkında Bingazi’den malumat-ı âtiye yazılmıştır.  Kasabamızın kıble cihetinde ve bir saat bad-ı  mesafede vaki Berka nam mahalde saye-i sütuvetvaye-i hazret-i padişahide akdemce inşasına mübaşeret olunup bu kere inşaatı reside-i hadd-i hitam olan 154 metre tulunda ve 16 metre arzında ve 2466 metre murabbaında cünud-ı zafer-nümud-ı cenab-ı padişahinin ikametine mahsus kışla-i hümayunun geçen şehr-i kânunuevvelde memurin-i mülkiye ve ümera-yı askeriye ile düvel-i mütehabe konsolosları ve muteberan-ı muhalliye hazır olduğu halde resm-i küşadı icra ve bu vesile ile de davet-i hayriyet-ayat hazret-i hilafetpenahi tekrar eda kılınmıştır.

İşbu kışla-i hümayunun karşısında mükemmel bir beylik bahçesi yapılmış ve enva-ı eşcar fidanları suret-i mahsusada Trablusgarp’tan celp ile gars edilmiştir.

Resimlerimiz yazısı ilk önce Servet-i Fünun Dergisi üzerinde ortaya çıktı.

Viyana sefaret-i seniyyesine tayin buyrulan atufetlü Mahmut Beyefendi Hazretlerinin bir kıta resimleri ile tezyin-i sütun-ı mübahat eyliyoruz. Müşarunileyh hazretleri bin iki yüz altmış sekiz sene-i hicriyesinde Dersaadet’te tevellüt eylemiştir. Mülga-yı mahrec-i aklamdan neşet ederek Tahrirat-ı Hariciye Kalemine çırak buyurulmuş 1292 senesinde Petersburg Sefaret-i Seniyyesine ataşe tayin olunarak 1293’te Berlin Sefaret-i Seniyyesine ikinci katip ve 1294 senesinde Viyana Sefaret-i Seniyyesine ikinci kitabete ve badehu Petersburg ikinci Sefaret-i Seniyyesi ikinci kitabetine ve bir müddet sonra Bükreş Sefaret-i Seniyyesi baş kitabetine terfian nakl-i memuriyet ederek oradan Bulgaristan Komiserliği baş kitabetine nasp olunmuş ve iki sene sonra Dersaadet’e avdetle Babıali Hukuk Müşavirliği refakatine ve sonra dahi Ticaret Nezaret-i Celilesi İstatistik Müdürlüğüne tayin buyurularak 1303 senesinde Belgrat sefaret-i seniyyesi baş kitabetine ve 1307’de fevkalade murahhas orta elçi sıfatıyla sefaret-i müşarünileyhaya nasip olunmuş ve bir müddet sonra Atina Sefaret-i Seniyyesine nakl-i memuriyet ederek 1308 senesinde büyükelçi sıfatıyla Roma Sefaret-i Seniyyesine tayin kılınmış ve bu kere dahi avatıf-ı seniyye-i hazret-i padişahiden Viyana Sefaret-i Seniyyesine nakl-i memuriyet eylemiştir. (…)

“Seyyah Jilber [Gilbert]”

İşbu sayfada tasvirini temaşa eylediğiniz zat yayan olarak devr-i alem etmeği tasmim etmiş bir Fransız seyyahıdır ki elyevm Bağdat’ta bulunur. Resmi Halep’te çıkartmış ve muhbir-i mahsusamız tarafından gazetemize gönderilmiştir.

Mösyö Jilber [Gilbert] geçen sene Kanunusani-i efrencînin 19’unda Paris’ten hareket ederek Fransa’yı, İspanya’yı maşiyen kat eyledikten sonra Cebeli Tarık Boğazı’ndan geçip Cezayir’i, Tunus’u ve Mısır’ın sahil kısmını yürümüş, Süveyş Kanalı’nı Hantara mevkiinden aşmış badehu El Arabeş yoluyla Gazze, Kudüs-i Şerif, Yafa, Beyrut, Şam-ı Şerif, Hamas, Hama şehirlerine uğrayarak tamamen 8000 kilometre kat ve Halep’e muvasalat etmiştir. Muhbirimizin ifadesine nazaran seyyah sıhhat ve afiyette bulunuyormuş, yürümekten hiç usanmamış. Mösyö Jilper memalik-i Osmaniye dâhilindeki seyahatinde fevkalade asar-ı mühimma-nevazı ve hüsn-i kabul gördüğünü ifade eylemiştir. (…)

Vakt-i hareketten akdem takarrür eden şerait-i seyahat mucibince bu zat bundan dört sene sonra yani 1900 senesi Mayıs’ının birinde ve yeni serginin hin-i küşadında Paris’te bulunacak ve böylece 63000 kilometre yol yürümüş olacaktır. Şüphesiz ki Mösyö Jilper’i sergide herkes kemal-i merakla temaşaya gidecektir.

Resimlerimiz yazısı ilk önce Servet-i Fünun Dergisi üzerinde ortaya çıktı.

Afrika-yı vusta’nın henüz münkeşif olmayan mevkiinden geşt ü güzar eden seyyahlar bir müşkile müsadif oluyorlar ki o da enhar-ı dâhiliyenin kabiliyet-i istifadesinden üzere oralarda bir sandala veya vapura malik bulunamamalarıydı. Vakıa parça parça ayrılıp hayvan sırtında naklolunan bazı istimbotlar yapılmış ise de bu dahi o kadar fayda vermemişti. Hâlbuki ahiren kendi kuvve-i mahrekesiyle denizde ve nehirde kat-ı mesafe eylediği gibi yere döşenecek muvakkat raylar üzerinde yürür bir istimbot imaline muvaffak olmuşlar ve seyyahlara büyük bir istifade bahş eylemişlerdir.  İşbu istimbotun resmini pişgâh-ı karine vaz eyliyoruz.

Resimlerimiz yazısı ilk önce Servet-i Fünun Dergisi üzerinde ortaya çıktı.