Doktorlar ve Süt Nineler

Mekteb-i tıbbiye-i şahane seririyat-ı cildiye ve efrenciye muallimi ve Fransa emraz-ı cildiye ve efrenciye cemiyeti aza-yı muhaberesinden doktor Celaleddin Muhtar Beyefendi’nin ahiren intişar eden eserleri [*] doktorlarla süt nineler hakkında nazar-ı dikkati celb etmekten hali kalmıyor.

Ettibbanın cemiyet-i beşeriye arasında işgal ettikleri mevkinin ne kadar şayan-ı hürmet olduğu düşünülünce insan bazı doktorların harekât-ı gayr-ı meşruası hasebiyle hasıl olan fikirleri söyleyeceği zaman bir tereddüde duçar oluyor. Çünkü bu şayan-ı levm ve takbih-i hareketinden, vücutları insaniyet için şeref-aver olan etıbba-yı muhtereme-i saireye de bazı cühelanın, bi-gayr-ı hakkın bir hassa-i tabip çıkarmasından korkuyor. Halbuki şüphe yok ki maatteessüf hem-meslekleri sayılan o kabil doktorların harekâtı hepimizden evvel ve hepimizden ziyade etibba-yı muhteremenin duçar-ı tan ve teşnii olmaktadır.

(…)

Celaleddin Muhtar Beyefendi’nin bu temennilere şiddetle iştirak ederek bu hakayık-ı faciayı herkesin nazar-ı ibretine vaz ettiklerinden dolayı kendilerini tebrik ile eserin kıraatini aile pederlerine, gençlere, hasılı bütün karilerimize son derece şiddetle tavsiye eyleriz.

[*] “Frengi Makalatı” – Karabet Matbaası – 2 Kuruş