Kadınlarda habl ve haml ahval-i tabiiyeden ise de her kadının gebeliği ve gebeliğe tahammülüve vaz-ı hamli ve vaz-ı hamle kabiliyeti bir değildir. Bazılarının bünyeleri hamle ve vaz-ı hamle müsait olmamasıyla böyle bir hâl, hamli ile beraber hamilini de tehlikede bulundurur. Birçok kadınlar, azasında bazı ahval-i gayr-i tabiiyenin vücudu hasebiyle tabii olarak doğuramayıp ya vakt-i mahsusunda veyahut vaktinden evvel ameliyat-ı fenniye icrasıyla doğurtulmaya muhtaçtır. (…)

(…) Viladethanenin ne olduğunu arz ve izaha mübaderet eylerim:

Hidemat-ı nafiası iki türlü yani bir takayyüt ve ihtimama muhtaç aciz gebelere bir melce ve diğeri tabip ve ebelerin tedrisat-ı ameliyesine mahsus bir mektep olan viladethane bir taraftan doğrudan doğruya fukaraya edeceği hizmet ve vakt-i zarurette ağniyaya irae eyleyeceği teshilat cihetiyle bir hayrathane diğer taraftan tabip ve kâbilelerin olması hasebiyle malumat-ı fenniye ve ameliyelerini ikmal edeceği için büyük bir dershane ala küllettakdirin refah-ı hal-i cemiyete fakr ve sefaleti tenkise tatbikat ve ameliyat-ı fenniyeye ve alelhusus tezayüd-i nüfusa hizmettir. Hamli tabii olan fakir bir kadın zamanı yaklaşınca viladethaneye iltica ile her türlü takayyüt ortasında kemal-i yesir ve suhuletle vaz-ı haml eyleyeceği cihetle badettevalid zuhur ederek ekseriyetle hamileleri ifna ve itlaf eden emraz ve arızattan her halde masun kalır.  (…)

[Hususi Fotografimizden]

[Hususi Fotografimizden]